Ginpahayag sang Malacanyang nga mas maayo kon personal nga mapaathag ni Bise Presidente Sara Duterte sa publiko ang mga akusasyon nga ginahaboy batok sa iya, imbes nga magsalig sa mga legal kag teknikal nga argumento agud mapabasura ang impeachment complaints.
Ini ang reaksyon sang Palasyo matapos nga mangin kabahin sang depensa sang kampo ni Duterte ang pagpangayo nga ibasura ang articles of impeachment nga yara sa atubangan sang Senate impeachment court.
Suno kay Claire Castro, mas makabulig sa publiko kon direkta nga masabat sang bise presidente ang mga alegasyon batok sa iya kag mahatag ang iya bahin sang istorya, sa baylo nga magtuon lamang sa mga isyu nga may kaangtanan sa proseso kag teknikalidad.
Gindugang pa ni Castro nga ang mga senador nga magaserbe bilang mga hukom sa impeachment trial ang may katungdanan sa pagdesisyon kon may yara sang basehan ukon wala ang mga reklamo. Busa, importante nga maipresentar ang mga ebidensya kag mga pagpamatuod sang tagsa ka kampo.
Suno pa sa Malacanyang, mahimo man nga mangin kahigayunan ini para kay VP Sara nga limpyuhan ang iya ngalan pinaagi sa paglatag sang mga dokumento kag ebidensya nga makasabat sa mga akusasyon nga ginahaboy batok sa iya. Ginpabutyag man sang Palasyo nga ang accountability isa ka importante nga prinsipyo para sa tanan nga opisyal sang gobyerno, kag ang pagtalakay sini yara na subong sa kamot sang Senado.
