ROXAS CITY – Malain nga tyempo ang isa sa ginalantaw nga rason sang gulpi nga pag-untat sang proyekto sa dalan sa Barangay Bailan banwa sang Pontevedra.
Sa interview sang Bombo Radyo kay Punong Barangay Vimie Arcenas, ginpahayag sini nga nakit-an man niya nga nagatinguha ang katapo sang Department of Public Works and Highways (DPWH) nga gilayon matapos ang dalan nga ginguba sa nasambit nga barangay.
Suno kay Arcenas nga sang nagliligad pa nga semana ginsuguran nga gub-on ang amu nga dalan.
Bangud sini, madamo nga mga pumuluyo kag motorista ang nagpalab-ot sang reklamo bangud sa tion nga mag-ulan nagatuga ini sang pagbaha sa dalan kag daw kaangay nga indi na makit-an ang intsakto nga dalan kag posible tunaan sang disgrasya.
Dugang pa sang Punong Barangay, nagpakig-angut na sila sa DPWH agud hibaluon kun san-o ang natalana nga tion agud matapos ang amu nga proyekto.
Nagapangayo man si Arcenas sang mahaba nga pag-intindi kag pasensya sa mga pumuluyo sa isturbo nga tuga sang amu nga dalan.
Panawagan sini sa talatapan sang DPWH nga butangan sang alagyan ang tubig baha bangud indi na makita ang dalan sang mga motorista.
