ROXAS CITY – Blangko sa karon ang malapit nga himata sang 37-anyos nga mangunguma nga ginluthang-patay sa sala sang ila puloy-an, sa Sitio Caningag, Brgy. Jolongajog, banwa sang Pontevedra, kaina sang 12:30 sa kaaganhon.
Sa interview sang Bombo Radyo kay Edwindo Manansala, paka-isa sang biktima nga si William Barrera, sang nasambit nga barangay, wala sila sang madumduman nga kontra sang ila himata.
Suno pa diri, posible nga ginhulat sang suspek nga makaabot sa ila puloy-an ang biktima kag sang nakakuha sang tion nga mahamuok ang katulogon sang tanan, didto kag nagplastar ang suspek.
Posible man suno diri nga ginpatuon sang suspek ang de-dose (12-gauge) nga sahi sang armas-luthang sa idalom sang mayor nga pertahan nga human sa plywood, kag didto nagpangluthang sang nahibaluan nga sa sala natulogan ang biktima bangud sa kahulogbon.
Dugang pa ni Manansala nga kaupod sang iya pakaisa nga nagpauli amu ang bata man sini nga menor de edad nga lalaki, nga amu ang nagmaneho sang motorsiklo nagikan sa ilimnan.
Matandaan nga samtang yara sa kwarto ang solterito, nakabati ini sang lupok kag sa iya pagtsekyar sa ila sala, nasapwan sini ang iya duguon nga amay.
Sa inisyal nga pagtsekyar sa bangkay sang biktima, may 9 ini ka igo sang armas-luthang sa iya likod, kag may yara man sa abaga.
Nahibaluan nga tatlo lang nga nagapuyo sa ila balay ang biktima kaupod ang duha ka mga menor de edad sini nga bata nga lalaki kag babayi, kag duha lamang ang pamalay sa lugar nga ginapalibutan sang kauyaparan.
Sa karon, ginahulat sang mga pakaisahan sini ang desisyon sang asawa sang biktima nga isa ka OFW.
Nagapadayon man ang imbestigasyon sang mga kapulisan angut sa krimen.
