Arestado ang 15 ka mga indibidwal bangud sa illegal nga pagpangisda sa baybayon nga sakop sang Panay, Capiz.
Ang operasyon ginpatigayon sang Panay Municipal Police Station kag Municipal Environment and Natural Resources Office ukon MENRO sang LGU Panay.
Sa interview sang Bombo Radyo kay Police Captain Eric Deocampo, Officer-in-Charge sang Panay Municipal Police Station, iya ginpahayag nga narekober sa operasyon ang isa ka steel boat nga nagabalor sang P1.5 million kag isa ka 8DC9 diesel engine, lakip ang nagkalain-lain nga kagamitan sa pagpangisda nga nagabalor sang P150,000.
Suno kay Deocampo, naglab-ot naman sa 150 ka kilo ang mga isda nga narekober sang mga otoridad sa amo nga operasyon.
Sa subong, yara na sa kustodiya sang MENRO ang mga arestado kag ang mga narekober nga ebidensiya para sa nagakaigo nga disposisyon.
