Naglunsyar ang Russia sang 614 ka mga bala sa pag-atake sa kahanginan batok sa Ukraine halin sang gab-i sang Miyerkules tubtob Huwebes, Agosto 21, suno sa report sang Kyiv Air Force.
Sa diin ang Russia nagpaguwa sang 574 ka mga drone kag 40 ka mga missiles, nga nagtuga sang kahalitan sa 11 ka mga lugar sa pungsod, lakip ang Mukachevo sa nakatundan nga bahin sang Ukraine.
Suno kay Ukrainian Foreign Minister Andrii Sybiha, lakip sa mga naigo amo ang isa ka daku nga American electronics manufacturer sa Mukachevo, nga nagtuga sang daku nga kahalitan kag mga pilas sa indi magkubos sa 19 ka tawo.
Ginpahayag ni Sybiha nga ang duog ginapuy-an lamang sang mga sibilyan, kag wala sang labot sa militar sang Ukraine.
Samtang, nagpanawagan naman si Ukrainian President Volodymyr Zelenskyy para sa mas hugot nga sanctions batuk sa Russia.
Sa iban nga bahin sang rehiyon sang Lviv, isa ka tawo ang napatay kag tatlo pa ang napilasan sa mga pagpamomba. Ang Ukrainian Air Force nagsiling nga ang pag-atake sang Miyerkules amo ang pinakamalain sugod sang Hulyo 12.
Ang mga awtoridad sa Voronezh kag Rostov nagsabat paagi sa pagsiling nga pila ka mga pasilidad sang Russia ang nahalitan man sang pagsalakay sang Ukraine.
