Ginakabig sang isa ka labor leader nga makahuluya ang madugay nga kadulaan ni Senator Ronald “Bato” Dela Rosa sa Senado.
Nobyembre 11 nag-umpisa ang pag-absent sang Senador tubtob subong sa diin duha na ka bulan ang kalawigon.
Sa interview sang Bombo Radyo kay Atty. Luke Espiritu, iya ginpahayag nga ang padayon nga kadulaan ni Senator Dela Rosa ang makaapekto sa iya legislative work kag kun indi na ini makahimo sang iya katungdanan bilang isa ka public official, mas maayo nga mag-resign na lang ini.
Suno kay Atty. Espiritu, indi lang ini tuhoy sa sweldo bangud bilang gin-eleher sang publiko, dapat nga mangin epektibo ini kuntani sa pagdihon sang mga layi para sa ikaayo sang mga pumuluyo.
Ginpaangid sang labor leader ang pagsulondan sang mga mamumugon kag senador sa diin iya ginpahayag nga kun ang isa ka empleyado ang mag-absent nga wala nagapabalo, gilayon ini magapangatubang sang konsekwensya apang kun sa bahin sang senador, makaangkon lang ini sang “free pass”.
Dugang pa sang natungdan, kun nagapalagyo ang isa ka public official kag indi na sini matungdan ang iya trabaho, mas mayo nga buy-an na lang ang position kag i-konsidera ini nga ‘resigned’.
Gin-emphasize pa ni Atty. Luke nga wala sang legal nga rason nga maka-justify sang absent ni Senator Dela Rosa sa sulod sang duha ka bulan samtang padayon ang pagbaton sang sweldo kag pribilehiyo.
