ROXAS CITY – Wala nagauntat ang lokal nga gobyerno sang banwa sang Mambusao sa pagtan-ay sang bulig sa kapin 40 ka mga Mambusaonon nga stranded sa karon sa isla sang Boracay.
Ini ang ginpahayag ni Mayor Leodegario Jun Labao, Jr. sang mainterview sang Bombo Radyo.
Suno kay Labao nga padayon sila sa pagpadala sang mga food packs kag iban pa nga kinahanglanon sang nasambit nga mga indibidwal bangud indi pa man mahimo nga mapapauli sila sa probinsiya.
Ginpahayag ni Labao nga indi pa nila mapapauli ang amo nga mga indibidwal bangud may naga-eksister pa nga laye nga nagadumili sa pagpasulod sang mga indibidwal sa Capiz nga gikan sa kaiping nga kaprobinsiyahanan.
Apang suno kay Labao, pananglitahan nga pahanugutan na ang pagpasulod sa Capiz sang mga taga-iban nga probinsiya, nakahanda ang quarantine facility sang ila banwa nga teniran sang magapauli nga mga stranded workers.
Handa ini para akomodahon sila suno kay Labao kag gilayon sila nga igadul-ong sa ila pamilya kun matapos na ang ila nga quarantine period.
