ROXAS CITY – Hugot nga ginpanindugan ni Mambusao Mayor Leodegario Jun Labao Jr., nga indi pamulitika ang tinutuyo sini sa iya pagpaguwa sang statement natuhoy sa pag-agda sa mga nagapalauli nga mga Locally Stranded Individuals (LSIs) kag Returning Overseas Filipino (ROF’s) nga magpaidalom sa quarantine sa banwa sang Mambusao, Capiz.
Ini ang ginkompirmar ni Labao sang mainterview sang Bombo Radyo.
Suno kay Labao nga nakahanda ini magbaton sang magapauli nga mga LSI’s kag ROF’s sa tion nga indi sila pagbatuon sang ila tagsa ka mga kabanwahanan.
Ginpahayag ni Labao nga naintiendihan sini ang sitwasyon sang mga LSI’s kag ROF’s subong nga COVID-19 Pandemic.
Apang, wala sini naluyagan ang mga komento kag patutsada ni Board Member Eleuper Martinez batuk sa iya post sa social media.
Suno kay Labao nga indi dapat magkomento ang nasambit nga board member bangud wala man ini nagapasilabot sa iya.
Dugang pa ni Labao nga wala man sang may nahimuan kag nabulig si Martinez sa banwa sang Mambusao bangud wala man ini masami nagatiner sa ila lugar.
Nahibaluan nga nagpadala sang sulat ang LMP-Capiz Chapter sa IATF sa diin ginahinyo sang mga alkalde nga temporaryo untaton anay ang pagpapauli sa mga LSI’s kag ROF’s tubtob nga wala pa sang kaugalingon nga RT-PCR testing laboratory ang probinsya.
