MAMBUSAO, CAPIZ- Ginpatpat sang hepe sang Mambusao Municipal Police Station ang mga accomplishments sang ila nga talatapan sa banwa sang Mambusao, Capiz halin Enero tubtob Hulyo 2025.
Sa interview sang Bombo Radyo kay Police Captain Dennis Losbañes, Hepe sang Mambusao Municipal Police Station, iya ginpakigbahin ang mga accomplishments sang ila nga talatapan sa diin nga nagreulta sa pag-angkon sang pasidungog nga Medalya ng Kagalingan ang bu-os nga talatapan sang gintalikdan nga pagbisita sang Regional Director sang Police Regional Office 6 sa probinsya sang Capiz.
Sa mga nanari-sari nga mga aktibidad nga ginpatigayon sang ila nga team, nakadakop sila sang 10 tanan ka mga wanted persons sa diin apat (4) ang most wanted kag anom (6) ang other wanted persons. Nakadakop man ini sila sang isa (1) ka indibiwal nga nagapatigayon sang illegal gambling kag isa (1) man ang nadakpan may kaangtanan sa iligal nga droga.
Pag-abot sa kampanya Tokhang Kontra Armas-Luthang (TKAL) nakarekord ang ila nga talatapan sang isa (1) ka madinalag-on nga search warrant operation kag pito (7) ang ginboluntaryo surrender bangud sa expired nga mga lisensya.
Nakarekord man ang ila nga istasyon sang duwa (2) ka mga indibidwal nga naglapas sa illegal logging, kag tatlo (3) man ang naaresto sa paglapas sa Comelec Gun Ban.
Nagdangat man sa 106 ka mga indibidwal ang nadakpan pamaagi sa paglapas sa traffic ordinance.
Samtang, pag-abot sa mga operasyon, madinalag-on nila nga napatigayon ang 612 nga checkpoints, 816 oplan bakal sita, 1,632 mobile patrolling, kag 45 ka mga symposiums kalakip ang barangay kag mga eskwelahan.
Pahayag ni Losbañes, ang nasambit nga mga kadalag-an ang indi malab-ot kun wala sa bulig sang mga pumuluyo kag pila pa ka mga ahensya rason nga nagapalab-ot ini sang pagpasalamat sa tagsa-tagsa.
Suportado naman nila ang bag-o nga programa nga ginapatuman sang hepe sang mga kapulisan partikular ang 5mins. response kag himuon ang tanan agud nga mapatuman ini sang maayos.
Lauman naman suno sa iya nga magapadayon ang tanan nga mga aktibidad sang mga katapo sang mambusao Municipal Police Station agud mapabilin ang kalinong kag katawhay sa palibot sang banwa.
Interviewed by Bombo Francis Biñas & Bombo Sunnie Mae Batencila
