SIGMA, CAPIZ – Nagpablotter sa pulisya ang isa ka manager sang isa ka transcient Hotel matapos nga ginaalegar ginkawatan ang duha nila ka mga customer sa banwa sang Sigma, Capiz.
Suno sa tagreklamo nga si Liden Santiago, 58 anyos kag manager sang isa ka transcient hotel sa Poblacion Sur, Sigma, Capiz nga ginaalegar nga may yara sang isa ka lalaki nga nagsulod kag ginaalegar nangawat sa duha sini ka mga customer nga temporaryo nga nag-check in sa amo nga hotel.
Ginkilala naman ang ginkawatan nga mga biktima nga amo sanday Edsel Quibet, 24 anyos sang Barangay Buenavista, Dingle, Iloilo kag Demavidas, 21 anyos sang Barangay Bagacay, San Rafael, Iloilo.
Base sa imbestigasyon, natigayon nga nasaka sang wala matumod nga suspek ang amo nga hotel sa diin natabuan nga wala nakakandado ang pirtahan sang kwarto sang duha ka mga customer.
Nataban naman sang kawatan ang laptop, kahita nga may unod nga kwarta, ATM Cards, cellphone kag pila ka mga importante nga kagamitan sang mga biktima.
Samtang, nakita naman sa CCTV footage sang amo nga hotel, nga may yara sang tawo nga nagsulod apang indi klaro ang itsura rason nga tubtob subong wala pa ini makila-an.
Sa karon, nagapadayon ang imbestigasyon sang mga kapulisan sa nasambit nga insidente.
