Nagapanguna sa gihapon ang mga manager sa listahan sang mga trabaho sa pungsod nga may pinakamataas nga sweldo kada adlaw.
Ini ang base sa Labor Force Survey sang Philippine Statistics Authority (PSA) para sa Abril 2025.
Suno sa PSA USec kag National statistician nga si Claire Dennis Mapa, ang adlaw-adlaw nga sweldo sang mga manager nagtaas sang gamay sang Abril 2025 tubtob sa P1,387 gikan sa P1,356 sang Abril 2024.
Base sa paglaragway sang PSA, ang mga manager amo ang nagaplano, nagadumala, nagakoordinar kag naga-ebalwar sang kabug-usan nga mga hilikuton sang mga negosyo, gobyerno kag iban pa nga mga organisasyon.
Ang Armed Forces Occupations ang ikaduha sa pinakamataas nga adlaw-adlaw nga sweldo, lakip ang tanan nga katapo sang Armed Forces magluwas sa mga yara sa depensa sibil pareho sang mga pulis kag mga inspektor sang aduana.
Ikatatlo sa listahan amo ang mga propesyonal sa patag sang sciences, social sciences, legal kag social services, art kag iban pa.
Ikaapat amo ang mga teknisyan kag mga kaupod nga propesyonal nga nagahimo sang mga teknikal nga buluhaton nga konektado sa mga konsepto sa siyensya ukon artistiko, mga pamaagi sa operasyon kag mga pagsulundan sang gobyerno ukon negosyo.
Ikalima amo ang mga clerical support workers nga ang ila trabaho nagalakip sang pagrekord, pag-organisar kag pagtipon sang impormasyon kag paghimo sang mga katungdanan sa clerical pareho sang pagdumala sang kuwarta, mga kahimusan sa pagbiyahe kag mga appointment.
