ROXAS CITY – Sa kagustuhan sang gobyerno sang syudad nga maathagan ang publiko angut sa kinalain sang HeaLth Clearance/Certificate kag Health Declaration, ginpatpat ini sa kahanginan sang Communications officer sang Roxas City government.
Ginpahayag ni Mr. Melvin Galagate nga ang health certification/clearance ang ginakuha sa city health office ukon rural health unit sa kabanwahanan kag kaundan sini ang impormasyon nga indi PUM ukon PUI ang naga-uyat sini nga dokumento samtang sa health declaration naman ginapafill-up ini sang form kag ginapasabat ang pila ka mga questionares kun magsulod sa Roxas City border.
Ginklaro man ni Galagate nga wala ginapangayuan sang health clearance ang mga residente sang syudad nga magasulod, kundi ID lamang nga magapamatood nga sa Roxas City ini naga-estar.
Katuyuan sa pagrequire sang health clearance/certification agud masiguro nga indi PUM ukon PUI ang nagasulod sa syudad.
Gintadlong man ni Galagate ang masami ginakomento sang iban nga ginaharang ang mga trak nga magasulod sa syudad, partikular ang nagakarga sang essential goods.
Suno diri nga sala ang terminolohiya nga gingamit, bangud bisan san-o wala nila ginaharangan ang trak nga nagadala sang pagkaon ukon essential goods, apang ila lamang ginatsekyar kun kumpleto ang dala nga papeles, bangud isa ini sa mga rekisitos agud masiguro nga wala sang makasulod nga mga PUI’s ukon PUM’s sa syudad.
Apang bangud may bag-o na nga mandu gikan sa Inter Agency Task Force (IATF) nga indi na pagpangitaan sang health certification ang mga driver sang trak nga maga-deliver sang pagkaon, wala sila sang mahimo kundi sundon ini.
