Wala pa sang may nabaton nga memorandum ukon direktiba gikan sa national office sang Philippine National Police sa Manila ang Capiz Police Provincial Office (CPPO) nga nagadumili sa pagguha sa balay sang mga indibidwal nga wala pa mabakunahan sang COVID-19 vaccines ukon pananglitan nga makaguha updan sila sang mga pulis pabalik sa ila mga puluy-an.
Ginpahayag ni Police Col. Laudemer Llaneta, bag-o nga provincial director sang CPPO nga sa karon wala pa ini nakabaton sang anuman nga direktiba angut sa mandu ni President Rodrigo Duterte batuk sa nagapakatig-a nga magpabakuna apang makita sa lagawan.
Apang sa tion nga makabaton na ini sang mandu, gilayon niya ini nga iga-implementar.
Nahibaluan nga padayon ang pagroving sang mga pulis sa kabanwahanan sa diin ginatsekyar kun ginasunod sang mga residente ang pagsuksok sang face mask kag pag-obserbar sang social distancing.
Nagapanagtag man sang face mask ang mga pulis sa ila maagyan nga wala nagasuksok sang face mask, agud malikawan ang paglapta sang Covid-19.
Samtang pag-abot sa bakuna, may yara na sang mga pulis nga bakunado samtang iban ang wala pa nakapabakuna.
