ROXAS CITY – Nagapabilin sa Bailan District Hospital ang magulang matapos nga ginluthang sang iya manghod, samtang masuwerte nga nakalikaw ang nagresponde nga pulis, sa isa ka binaylehan sa Brgy. Agbalo, Panay, Capiz, ala-1:30 kaina sang kaaganhon, Setyembre 4.
Ginkilala ang biktima kay Noel Tupaz Dumali, 41-anyos, residente sang nasambit nga lugar, kag si PSMS Rey Falco sang Panay MPS, 46-anyos, residente sang Brgy. Mongpong, Roxas City.
Samtang ang suspek ang ginkilala kay Jemar Tupaz Dumali, 36-anyos, residente sang Brgy. Tacas, Pontevedra, Capiz.
Sandig sa inisyal nga imbestigasyon sang Panay MPS, naga-park sa guwa sang binaylehan ang traysikol nga ginamaneho sang biktima, sang hinali nga nag-abot ang suspek kag nagpangluthang, gamit ang wala matumod nga armas.
Naigo sa nawala nga tiil ang biktima.
Pagkabati sang mga naka-duty nga kapulisan sa sulod sang binaylehan, nagguwa si PSMS Falco, kaupod sanday PCpl Jesan Cantonjos kag Gilbert Elequillo miyembro sang FBBI, kag ginsinggitan ang suspek, apang sa baylo nga magpondo, ginluthang niya ang pulis nga si Falco.
Nahibaluan nga antes paman ang pagpangluthang, ginsita sang biktima ang mag-asawa nga nag-inaway.
Ginpahayag nga yara sa impluwensiya sang makahulubog nga ilimnon ang suspek sang natabo ang insidente.
Sa karon, nagapabilin sa Panay MPS ang suspek matapos nga boluntaryo nga nagsungka sa mga kapulisan.
Desidido naman ang pulis nga magpasaka sang nagakaigo nga kaso batuk sa suspek.
Samtang, nakadepende naman sa utod sang suspek kun magapasaka ini sang kaso batuk sa iya manghod.
