MAAYON CAPIZ – Nagapabilin sa kustodiya sang Maayon Municipal Police Station ang manghod nga nagpanglabo sa kaugalingon sini nga magulang sa Sitio Tipulo, Barangay Indayagan, Maayon, Capiz.
Matandaan nga ginkilala ang biktima kay alyas RicRic, 51-anyos samtang ang ginatudlo nga suspek amo si alyas Cardo, 31-anyos nga lunsay residente sang nasambit nga lugar.
Sa interview sang Bombo Radyo kay Police Major Syril Punzalan, hepe sa Maayon Municipal Police Station ginpahayag sini nga sang natabo ang insidente naga-inum-inum ang biktima kaupod ang bayaw sini sang hinali nga nag-abot ang suspek kag ginkomprontar may kaangtanan sa anay na nga hiligut-anon kag didto wala sang kaluoy nga ginlabo ang kaugalingon sini nga magulang.
Bangud sini, nag-angkon sang pilas sa magkatuhay nga parte sang lawas ang biktima nga madasig naman ginpadangat sa Bailan District Hospital para sa nagakaigo nga pagbulong.
Pangabay ni Punzalan sa iya nasakupan, nga kun may kalain sang buot sa isa kag isa hinalaan ukon ipalab-ot sa barangay agud gilayon nga mahatagan sang solusyon kag indi magresulta sa kaangay sini nga insidente.
