ROXAS CITY – Nagapabilin nga ginabulong sa ospital ang isa ka manghod matapos nga ginluthang sang magulang sa Sitio Lanitga, Barangay Sinamongan, Pilar, Capiz.
Ginkilala ang biktima nga si Pio Evangelio 34-anyos sang nasambit nga lugar.
Base sa inisyal nga imbestigasyon sang Pilar Municipal Police Station nga samtang magkaupod nga naga-inom ang suspek nga si Generoso Evangelio sa balay sang biktima sang nag-angkon na lamang sang pagbinaisay sa magtimbang bahin.
Bangud sa kaakig nagkuha ang biktima sang sanduko kag tuyo kuntani nga bun-on ang magulang.
Apang, wala ini naigo bangud nagserbi nga sagang ang halayan.
Bangud diri, ginpakamaayo na lamang sang magulang nga magpuli apang ginsunod sa gihapon ini sang iya manghod kag tuyo gid nga bun-on apang wala nadayon matapos nga ginluthang ni Generoso si Pio gamit ang .357 nga revolver nga armas luthang.
Bangud diri, nag-angkon sang pilas sa nawala nga dughag ang biktima nga gilayon naman gindala sa ospital kag padayon nga ginabulong.
Samtang, boluntaryo naman nga nagsungka sa mga pulis si Generoso matapos ang insidente.
Apang, gilayon man ini nga nakaguwa matapos nga nag-execute sang affidavit of non interest ang pamilya.
Hinubog naman ang ginalantaw nga motibo sa nagluntad nga insidente.
