ROXAS CITY – Pilason ang 31-anyos nga lalaki, matapos ginapahayag nga ginbuno sang kaugalingon sini nga magulang sa Santo Anghel, Dumalag Capiz takna 5:15 kahapon Nobyembre 27, 2023.
Ginkilala ang biktima kay alyas “Toto” 31-anyos samtang ang suspek ang ginkilala kay alyas “Jojo” 41-anyos lunsay yara sa legal nga pang-edaron kag residente sa nasambit nga lugar.
Sandig sa nakuha nga report sang Bombo Radyo nagikan sa Dumalag Municipal Police Station, ginapahayag nga nagpauli sa ila puluy-an ang biktima kag naabtan sini diri ang iya magulang kag may nagpatunga nga wala sang pag-intindihanay s rason nga ginsumbag sang biktima ang suspek.
Bangud sa kaakig, nagkuha sang kutsilyo ang suspek kag hinali nga ginbuno ang biktima sang maka-apat ka beses kung sa diin naigo ini sa dughan.
Madasig naman nga ginpadangat sa Senator Gerardo M. Roxas Memorial District Hospital, Dao Capiz ang biktima para sa nagakaigo nga pagbulong.
Samtang, boluntaryo naman nga nagsungka ang suspek kag sa karun nakahunong na ini sa Dao Municipal Police Station, para sa nagakaigo nga disposisyon.
