ROXAS CITY – Nag-angkon sang pilas sa tiyan ang manghod matapos nga ginaalegar ginbuno sang magulang sa Hermano Subdivision, Barangay Punta Tabuc, Roxas City.
Ginkilala ang biktima nga si Albert Aluad Deocampo 29-anyos sang nasambit nga lugar.
Base sa inisyal nga imbestigasyon sang Roxas City Police Station nga magkaupod man sila nga nag-inom sang suspek nga iya man magulang nga si Anthony Aluad Deocampo 38-anyos sang amo man nga lugar.
Apang, nag-angkon sang indi pag-intiendihanay sa tunga sang biktima kag suspek rason nga nagresulta sang kinagamo sa magtimbang nga bahin.
Mahibaluan nga una ginlamposan sang biktima sang botelya ang iya magulang sa nawong rason nga ginbalusan man ini kag ginbuno sa tiyan.
Bangud diri nag-angkon sang pilas sa nawong si Anthony samtang pilas naman sa tiyan ang naangkon ni Albert kun sa diin ginapahayag nga nagaguwa na ang iya kasudlan.
Sa interview sang Bombo Radyo kay Reynoy Diosana, driver sang tricycle nga nag dul-ong sa biktima sa ospital ginpahayag sini nga samtang nagamaneho ini sang iya tricycle nagpangayo sang bulig ang pila ka mga residente sa lugar.
Bangud diri, ginpasakay niya ang biktima sa iya nga tricycle kag gindul-ong sa ospital.
Dugang pa sini nga base sa ila pagpangusisa nga botelya ang ginamit sa pagbuno sa tiyan sang biktima.
Mahibaluan nga yara sa idalom sang impluwensya sang makahulubog nga ilimnon ang biktima kag suspek sang natabo ang insidente.
Samtang, temporaryo naman nga ginhunong sa karsel sang Roxas City Police Station si Anthony samtang ginhilway man ni gilayon sa presuhan matapos nga wala man sang plano nga magpasaka ang iya pamilya.
Nagapadayon naman ang imbestigasyon sang mga pulis sa nagluntad nga krimen.
