Roxas City – Arestado ang isa ka mangingisda matapos nga gin-implementaran sang search warrant sa Barangay Solo, Pontevedra Capiz.
Ginkilala ang arestado kay Berlito Borce Jr, 48-anyos kag residente sang nasambit nga lugar.
Mahibaluan natigayon nga madakpan si Borce pina-agi sa gintingub nga pwersa sang 1st Capiz Provincial Mobile Force Company 3rd Maneuver Platoon, Capiz Police Intelligence Unit kag Pontevedra Municipal Police Station.
Ang nasambit nga search warrant ang gin-isyu kag ginpirmahan ni Lorencito B. Diaz, Acting Executive Judge nga napetsahan sadtong Marso 17, 2023.
Narekober sang kapulisan ang 1 ka homemade pistolized 13 gauge shotgun, kag 4 ka bala sang 12 gauge.
Paglapas sa kaso nga RA 10591 ukon ang Comprehensive Firearms and Ammunition Regulation Act ang panga-atubangon ni Borce.
Sa karon nakahunong na si Borce sa Pontevedra Municipal Police Station para sa nagaka-igo nga disposisyon.
