ROXAS CITY – Na-rescue na sang mga katapu sang Philippine Coastguard (PCG-Roxas) ang isa ka mangingisda nga nauna ginreport missing matapos nga nagpa-lawud kahapon para magpangasag sa kalalawran sang Punta Carles kag Sapatos Gamay, Carles, Iloilo.
Ginpahayag ni Lt. Commander Edison Diaz, pinuno sang PCG-Roxas nga ginkumpirma mismo sang iya personnel nga kabahin sang search and rescue team nga nagpanguna sa pagpangita kay Richard Alimonsorin 28-anyos sang Isla sang Olutayan ang nasambit nga impormasyon.
Nauna diri, nagpangayo sang bulig sa PCG-Roxas si Mrs. Maria Alimonsorin, iloy ni Richard matapos nga napaslawan nga makapauli ang iya anak nga nagpalawud para magpangasag.
Suno sa ginang nga nabalaka sila bangud ini pa lamang ang una nga tion nga wala nakapauli sa ila balay ang anak matapos nga magpalawud.
Nahibaluan nga may kaupod nga iban nga motorbanca nga nagpangasag si Alimonsorin, apang nag-una pauli matapos nga nakakuha na sang bastante nga kasag nga ila ginbaligya.
