ROXAS CITY – Arestado ang isa ka mangunguma, matapos makuhaan sang indi lisensyado nga armas-luthang sa Barangay Balogo, Pilar Capiz takna alas 3:00 sang kaaganhon Hulyo 23.
Ginkilala ang nadakpan kay Jomar Balaos 36-anyos kag residente sang Barangay San Antonio sa nasambit nga banwa.
Sa impormasyon nga nakuha sang Bombo Radyo sa Pilar Municipal Police Station, samtang nagapatigayon sang Oplan Bakal Sita ang katapo sang kapulisan nakit-an sang mga ini nga may yara sang ginabitbit nga isa homemade 45 caliber pistol si Balaos.
Bangud sini, gilayon ini nga ginpalapitan sang Pilas MPS agud pangayuan sang nagakaigo nga dokumento apang napaslawan si Balaos nga magpakita sini.
Kaso nga paglapas sa Republic Act 10591 ukon Comprehensive Firearms and Ammunition Regulation Act ang paga-atubangon sang nadakpan.
Sa karun yara na ini sa paghinakop sang Pilar Municipal Police Station, para sa nagakaigo nga disposisyon.
