ROXAS CITY – Samaron nga ginpadangat sa ospital ang isa ka mangunguma matapos ginluthang sa Barangay Mansacul banwa sang Sigma, Capiz.
Ginkilala ang biktima kay Joseph Semino, 54 anyos sang Sitio Kadagmayan, Barangay Balucuan sang nasambit nga banwa.
Sandig sa inisyal nga imbestigasyon sang Sigma Municipal Police Station, nagalakat ang biktima upod ang duha sini ka mga kaupdanan sang hinali ini nga gintiro sang suspek nga ginkilala kay Leonedis Daulo, 41 anyos sang nasambit nga lugar gamit ang wala mahibaluan nga kalibre sang armas luthang.
Nag-angkon ang biktima sang igo sa nawala nga abaga lapus sa nawala nga dughan tuga sang pagpangluthang.
Madasig ini nga gindala sa Mambusao District Hospital apang gilayon man nga ginsaylo sa isa ka pribado nga ospital sa syudad sang Roxas para sa dugang sini nga pagbulong samtang madasig man nga naaresto ang suspek kag nagapabilin sa karon sa karsel sang Sigma Municipal Police Station para sa nagakaigo sini nga disposisyon.
Nagaguha sa imbestigasyon nga posible daan nga hiligut-anon ang motibo sang suspek sa pagpangluthang sa biktima kun sa diin nagapabilin sa karon sa ospital.
