Nagapati ang pamilya sang 41-anyos nga mangunguma nga wala sang foul play sa kamatayon sang ila himata kag ini mismo ang nag-utas sang kaugalingon nga kabuhi pinaagi sa pagbitay sa Barangay San Jose, sining syudad.
Ginpahayag ni Mr. Wilfredo Gregorio Sr., amay sang biktima nga si alyas Wilfredo nga wala sila sang ideya kun ano ang nagtulod sa iya anak para utason ang kaugalingon nga kabuhi, bangud wala man ini sang ginahambal sa ila.
Suno sa amay nga siya ang nakakita kaina sang aga sa biktima sang naga-init ini sang tubig.
Ginkatingala sini nga yara sa puno sang mangga ang iya anak sa diin nagpati nga posible natulugan lamang ini bangud sa kahulugbon.
Apang sang iya na gintandog ang biktima, natalupangdan sini ang pisi sa liog sang anak nga nakahigot sa sanga sang mangga.
Nakumpirma lamang nga wala na sang kabuhi ang biktima matapos nga naglaylay ang iya liog kag matig-a na ang lawas sini.
Nagdesisyon na ang amay nga indi na pag-ipaidalum sa otopsiya ang bangkay sang biktima.
Samtang suno naman sa iloy sang biktima nga daku nga palaligban sa ila ang rason sang pagpanginmatay sang iya nga anak.
Ginpahayag sang ginang nga wala sila nakabatyag nga nagsulod sa ila balay si alyas Wilfredo.
Apang nahibaluan nga hubog ini sang nagpauli matapos nga nag-inom sa Barangay Liong.
Wala man nakasugid sa ila ang biktima nga may ginadala ini nga problema ukon may ginasuprer nga balatian.
Apang natandaan lamang sang ginang nga nakaangkon sang pagbaisay ang biktima kag utod sini samtang nagainom sila nga para sa iya normal lamang sa mag-utod.
