ROXAS CITY – Nagdangop sa estasyon sang Bombo Radyo ang isa ka mangunguma matapos nga ginaalegar ginkumpiskar ang ila ginbulad nga kupras sa uyapad ni Rolly Degala kag sang tatlo ka mga pulis sang Pontevedra Municipal Police Station.
Suno kay Romeo Lamson nga ginkakibot sini sang ginkuha ni Degala ang ila ginbulad nga siyam ka sako sang kupras sa uyapad matapos ginpasibangdan ini nga nagkawat sang lubi agud himuon nga kupras.
Ginpahayag ni Lamson nga madugay na sila nga nagakupras sa duta nga ginapanag-iyahan sang pamilya Consing kun sa diin si John Demala ang nagaserbi nga bantay sang amo nga kadutaan.
Apang suno sa iya ang tinawo sang pamilya Consing nga si Degala ang nagamandu nga kuhaon ang ila ginpangbulad.
Ginpanindugan ni Lamson nga kun ginkawat sini ang kupras wala na kuntani niya ini ginbulad pa sa uyapad.
Bangud sang natabo ginpakamaayo na lamang sini nga ipabalhag sa ila nga barangay kag sa Pontevedra PNP ang natabo.
Luyag lamang mahibaluan ni Lamson kun ano ang basehan ni Degala kag sang tatlo ka mga pulis sang Pontevedra PNP sa pagkumpiskar sang mga kupras.
Samtang ginpahayag sang presidente sang Kahublagan sang Mangunguma sa Capiz nga si Angelo Orence ang wala man sang may ginauyatan nga papel si Degala agud magpangsita kag magpangkumpiskar sang binulad nga kupras.
Ginkwestiyon man sini ang pag-upod sang mga kapulisan kay Degala sa pagpangkompiskar.
Suno pa diri nga madugay na nga ginareklamo sang mga mangunguma ang ginahimu nga pagpamigos ni Degala.
