Yara na sa estable nga kondisyon ang 37-anyos nga mangunguma matapos ginpulihan buno sang magpalakaisa sa Barangay Cogon, Sigma, Capiz.
Matandaan nga nag-angkon sang pilas sa tiyan ang biktima nga ginkilala kay alyas “Randy”, residente sa nasambit nga lugar, samtang ang mga suspetsado naman ang ginkilala nga sanday alyas “Roland”, 41-anyos, alyas “Argie”, 33-anyos, mag-utod kag lunsay residente man sang nasambit nga lugar kag si alyas “Jonathan”, 40-anyos, residente sang banwa sang Dumarao.
Sa interview sang Bombo Radyo kay PCPT Mark Anthony Garcia, ginpahayag sini nga samtang naga-inom-inom ang mga suspek sa puluy-an ni Roland, hinali na lamang nag-abot si Randy agud kuntani badlungon ang mga ini bangud nagatuga ini sang gahod magahod.
Apang, may nagluntad nga komprontasyon sa tunga sang biktima kag suspek kag didto na nga hinali nga ginpulihan buno sang tatlo ka ma suspetsado si Randy.
Nahibaluan nga yara sa impluwensya sang makahulubog nga ilimnon ang mga suspek kag ang biktima.
Sa karon, padayon pa ang imbestigasyon sang mga katapo sang kapulisan angut sa nasambit nga insidente kag yara na sa kustodiya sang Sigma MPS ang tatlo ka mga suspetsado para sa nagakaigo nga disposisyon.
