ROXAS CITY – Nasal-an nga kaaway ang mangunguma nga ginpulihan buno sang 2 ka mag-utod sang Enero 28, 2024 sa Barangay Maralag, Mambusao, Capiz.
Ini ang ginpahayag ni PLt. Shaney Allanic, Officer in Charge sang Mambusao Municipal Police Station sang mainterview sang Bombo Radyo.
Suno kay Allanic, nasal-an si Joan Monahan (biktima) nga iya pakaisa (nga amu ang kaaway) sang mga suspek bangud sa gamit sini nga traysikol.
Mahibaluan nauna nga nagpauli ang pakaisa ni Monahan, gani ini na lang ang nagmaneho sang traysikol nagikan sa binaylehan.
Apang, wala ginadahum-dahuma ni Monahan nga bangga-an ini sang mag-utod nga sanday Albert kag Joemer Maceda.
Diri na ginpulihan buno sang mag-utod si Monahan sa nagkalain-lain nga parte sang lawas nga nagresulta sang iya kamatayon.
Matandaan, antes ang krimen may nagluntad nga pagbinaisay sa tunga sang mga suspek kag pakaisa sang biktima sa guwa sang binaylehan.
Mahibaluan nga lunsay yara sa impluwensya sang makahulubog nga ilimnon ang mga suspek sang natabo ang krimen.
Pahayag ni Allanic, ginahulat na lang ang death certificate kag resulta sang post mortem examination agud mapasaka na ang kaso nga murder batok sa mga suspetsado.
Sa karon, nagapabilin sa karsel ang mag-utod para sa nagakaigo nga disposisyon.
