ROXAS CITY – Pilason ang 52-anyos nga lalaki, matapos nga ginbuno sang 43-anyos nga babayi, sa Sitio Balud, Brgy. Nasunogan, Dao, Capiz.
Ginkilala ang biktima kay Fernando Esportuno, samtang ang suspek ang ginkilala kay Flordeliza Evio, lunsay mga mangunguma kag residente sang nasambit nga barangay.
Sa inisyal nga imbestigasyon sang mga katapo sang Dao MPS, mga alas-9:30 kagab-i sang Martes, Agosto 16, sang naga-inom-inom ang biktima kag suspek sa isa ka kaadlawan sa balay ni Ronaldo Katuiran, makaligad ang isa ka oras, nagdesisyon ang biktima nga magpauli sa ila balay, apang sa iya pagbukas sang ila pertahan, ginpahayag nga nag-abot ang suspek kag nagpatunga ang pag-ilinaway nga gilayon ini ginbuno gamit ang kutsilyo.
Naigo ang biktima sa iya tangkugo, kag madasig nga ginpadangat sang iya pamilya sa Dao District Hospital, nga natigayon mabulong bilang out-patient.
Boluntaryo man nga nagsungka ang suspek sa ila Brgy. Tanod kag ginturn-over sa Dao MPS para sa dugang nga imbestigasyon.
Ginahibalo pa ang motibo sa insidente.
