PANITAN, CAPIZ – Dead on arrival na sang gindala sa ospital ang isa ka 50-anyos nga mangunguma matapos aksidente nga naigu sang nakakas nga steel platform gikan sa isa ka close van truck sa dalanon sang Barangay Salocon, Panitan, Capiz.
Ginkilala ang biktima kay Ernie Lopez, 50 anyos sang nasambit nga lugar.
Base sa nangin imbestigasyon sang Panitan PNP, samtang ginasubay ang dalanon sang truck nga ginamaneho ni Rachelio Bucio, 47-anyos sang Sampaloc, Manila kag padulong na kuntani sa siyudad sang Roxas hinali na lamang nga nakakas ang steel platform sang truck kag nagtabug sa nagalakat nga biktima sa kilid sang karsada.
Nahibaluan nga may karga nga mga bulong sang manok ang amo nga truck.
Ginapatihan nga posible madasig ang dalagan sang nasambit nga truck.
Sa karon, yara na sa kustodiya sang Panitan Municipal Police Station ang driver sang truck.
