Patay ang mangunguma matapos magbunggo ang iya ginamaneho nga motorsiklo sa nasugata niya nga elf truck sa Sitio Lip-ak, Barangay Pinay, Mambusao, Capiz.
Ang biktima amo si alyas Bert, 61 anyos samtang ang driver sang truck amo si alyas Jo, 42 anyos.
Sa interview sang Bombo Radyo kay Police Major Ruby C. Magallanes, Officer-in-Charge sang Mambusao Municipal Police Station, iya ginpahayag nga nagabyahe ang truck kag motorsiklo sa lain-lain nga direksyon kag ginaalegar nga nadulaan sang kontrol ang biktima kag naagaw ang linya sang truck.
Suno kay Magallanes, gintinguhaan pa kuntani sang driver sang truck nga maglikaw apang nahulog ini sa uyapad kag napilasan.
Nagpahanumdom ang Mambusao PNP sa mga motorista nga maghalong sa pagbyahe kag likawan ang paglapas sa layi sa dalanon agud malikawan ang disgrasya.
