Naglunsyar subong nga adlaw sang Lunes, ang grupo nga transportasyon nga Manibela agud ganyaton si Pangulong Ferdinand Marcos Jr. nga ibasura ang Public Transport Modernization Program.
Suno kay Manibela Chairman Mar Valbuena, nakapokus ang nasambit nga strike sa mga protest center sa Monumento, Nagtahan, Pasig Palengke, Starmall-Alabang, Gatchalian Puregold Parañaque, Punta Tulay Manila, Muñoz Market Quezon City, Marcos Hi-Way Marikina, Shell- Brgy Gulod Novaliches QC, Camarin Zapote Road North Caloocan kag Pulang Lupa Bernabe Las Piñas City.
Nagalaum naman ang grupo nga mabatian sila sang Presidente kag mabasa ang resolusyon sang Senado nga nagpanawagan para sa suspensiyon sang programa.
Ginsiling pa ni Valbuena nga indi pa handa ang pungsod para sa PUV Modernization program.
Ang transport strike sang grupo subong nga adlaw, patilaw pa lamang suno sa mga ini nga ilunsyar sa tatlo ka adlaw nga pag-untat sang biyahe sa Miyerkules,Agosto 14 tubtob Biyernes, Agosto 16.
Matandaan nga ginlunsyar ang programa sadtong 2017 apang nadelayed sang pila ka beses bangud sa mga protesta kag pag-igo sang COVID-19.
Pag-eksplekar sang mga driver nga nagapamalabag sa amu nga programa ang pagbakal sang tuman ka mahal, bag-o kag modern nga unit kun sa diin magalubog lamang sa ila saa utang kag indi sila makatipon sang kwarta agud mabayaran.
