ROXAS CITY – Nagapabilin nga missing ang isa ka 73-anyos nga manug-ice cream matapos ginaalegar nalumos sa suba nga sakop sang Marcelo Street, Barangay Poblacion Proper sa banwa sang Mambusao.
Ginkilala ang biktima nga si Leodegario Soriano Leonardo, residente man sang nasambit nga lugar.
Sandig sa Mambusao Municipal Police Station, nagpadulong sa ila talatapan ang asawa sang biktima nga si Wellita Fernando Leonardo, 68-anyos agud mangayo sang bulig.
Ginapahayag nga takna alas 4:00 kaina sang kaagahon sang naglakat ang iya asawa sakay sa ila traysikad agud magbakal sang bloke sang ice para sa ginabaligya sini nga ice cream apang ginapahayag nga wala na ini makapauli.
Samtang, ginapangita na ang nasambit nga biktima, may isa ka residente nga nakasugid sa ila nga ginkilala kay Arlyn Harion Ilono, nga suno diri takna alas 4:05 kaina sang kaagahon sang may nabatian ini nga lagapok nga kaangay may nahulog sa suba.
Madasig naman ini nga gintsekyar sang mga otoridad kag narekober sa lugar ang isa ka traysikad kag sako indi magnubo 10 metros ang kalayuon sa puluy-an sang biktima.
Sa karun, padayon pa ang ginahiwat nga search and retrieval operation kag imbestigasyon sang mga otoridad.
