ROXAS CITY – Nagapabilin sa Roxas Memorial Provincial Hospital (RMPH) ang 33-anyos nga manug-oling matapos nga ginlabo sang 40-anyos nga kaangay manug-oling, sa Sitio Agduduyan, Brgy. Timpas, banwa sang Panit-an.
Ginkilala ang biktima kay Ryan Atinado Olisco, residente sang Brgy. Poblacion Sur, Ivisan, Capiz.
Samtang ang suspek ang ginkilala kay Anthony Dapugo Batolay, nga residente sang Brgy. Malapad Cogon, Sigma, Capiz.
Sandig sa inisyal nga imbestigasyon ni PSMS Elmer Daliva sang Panit-an MPS, nag-inom-inom ang duha kahapon sang hapon sa guwa sang balay ni Rolando Vinerable, apang sang ulihi, samtang nagakatulog ang biktima, hinali ini nga ginlabo sang suspek gamit ang binangon nga naigo sa iya ulo kag likod.
Sa bahin sang suspek, ginaalegar sini nga nauna nga nagpangtapungol ang biktima, apang ginhulat niya ini nga matulogan agud magbalos.
Gilayon nga nalagyo ang supsek matapos ang pagpanglabo apang sang ulihi, nagsungka man ini kay Brgy. Kapitan Arsenio Daliva sa amu nga barangay.
Narekober sa lugar ang gingamit nga bolo sa pagpanglabo.
Sa karon, nakahunong sa karsel sang Panit-an MPS ang nasambit nga suspek.
Ginahibalo pa ang madalom nga motibo sa insidente.
