ROXAS CITY – Ginpabutyag sang isa ka manug-uga nga apektado sila sa pagmahal sang asin, nga isa sa ila ginagamit sa negosyo nga ugahan.
Sa interview sang Bombo Radyo kay Marilou Sanchez sang Brgy. Baybay, Roxas City, suno diri nga kun sadto anay sa bulan sang Hunyo P300 lang ang presyo sa kada sako sang asin, sa karon P450 na ini.
Dugang pa diri, nga wala pa diri nalakip ang bayad sa iban pa nga galastuhanon kaangay sa transportasyon bangud sa Mindoro pa ang mga ini nagakuha sang asin.
Ginatudlo nga rason sang pagtaas sa presyo sang asin bangud suno diri sa pagpanalasa sang bagyong Agaton.
Halos gamay naman ang ila ginansya sa ugahan bangud mahal ang ila bakal sang preska nga isda, apang manubo ang ila baligya sang uga.
Apang, suno kay Sanchez nga bastante pa ang suplay sang ila ginakuhaan sang asin, kag wala man sila sa karon nagpataas sa presyo sang uga.
