ROXAS CITY – Dismayado ang isa ka manugbaligya sang saging sa Burgos Talipapa matapos nga nakabaton sang peke nga kuwarta, kahapon nga adlaw, Hunyo 27.
Sa interview sang Bombo Radyo kay Julie Casumpang, suno diri ginabulubanta takna 12:00 – 1:30 sang hapon, may isa ka lalaki ang nagbakal sa iya sang isa ka sipi nga lakatan nga nagabalor sang P120 kag ginbayaran sang P500.
Aminado ini nga wala na tsekyar ang kuwarta kag gilayon nga ginbaton kag ginsinsilyuhan sang P380.
Apang, takna 2:30 sang hapon nakibot na lamang si Casumpang nga peke ang iya nabaton nga kuwarta pinaagi sa money detector sang isa ka pharmacy store nga kaiping sang iya baligyaan.
Indi lang isa ka P500 kundi duha kabilog ang peke nga kuwarta ang iya nabaton kun sa diin ang isa ka P500 ang benta man niya sang nanligad nga adlaw.
Wala ini nagalaum nga peke ang ginbayad sa iya bangud kaangay gid ini sang orihinal nga kuwarta sa una nga pagtan-aw.
Nagapati si Casumpang nga isa lang ka persona ang yara sa likod sang pagpanunto kag posible suno diri nga bangud nakalusot sa iya ang peke nga kuwarta sang nanligad nga adlaw kag ginliwat pa pagkasunod nga adlaw.
Panugyan sini sa mga kaangay nga manugbaligya nga mangin alerto kag tsekyaron sang maayo ang ginabayad nga kuwarta agud malikawan nga matunto.
