Manugbaligya sang utan, pilason matapos mahapit sang sidecar sang isa ka tricycle sa TATC

ROXAS CITY – Pilason nga ginpadangat sa ospital ang isa ka ginang matapos na-sideswipe sang sidecar sang isa ka tricycle sa Teodoro Arcenas Trade Centre, Barangay VIII, Roxas City.

Ginkilala ang biktima kay Judith Sevillo, 59 anyos kag residente sang Barangay Banica sining syudad.

Sandig sa inisyal nga imbestigasyon sang Roxas City Police Station, samtang nagabaligya ang biktima sa merkado publiko sang TATC sang aksidente ini nga nahapit sang sidecar sang tricycle nga ginamaneho ni Danilo Salcedo, 60 anyos sang Barangay Quios banwa sang Panitan, Capiz.

Bangud sini, nag-angkon sang mga kasamaran ang biktima nga madasig man nga gindapatan sang first aid apang gilayon nga ginpadangat sa ospital para sa dugang nga pagbulong.