ROXAS CITY – Nagapasalamat si Ivisan Mayor Felipe Neri ‘Ipe’ Yap sa kooperasyon sang mga Ivisanon, angut sa mandu sang ila Local Government Unit kag sang gobyerno probinsyal nga temporaryo nga pag-untat sa pagbaligya, pagharvest ukon sa pagkaon sang panginhason.
Ini matapos nga nagpositibo sa red tide ang shellfish meat sample nga nakuha sa ila kadagatan.
Sa interview sang Bombo Radyo kay Yap, ginpahayag sini nga nagadihon na sila sang tikang agud mabuligan ang mga apektado nga pumuluyo sa nasambit nga phenomenon.
Sa pagkamatuod, nagalista na sa karon ang ila Municipal Agriculture Office (MAO) sang mga pangalan nga apektado ang ila palangitan-an bangud sa red tide.
Naga-amat-amat naman suno diri pamutos sang food packs ang katapo sang Municipal Social Welfare and Development Office (MSWDO) kag posible nga magapatigayon sang cash for work nga mangin benepisyaryo ang mga fisherfolks.
Dugang pa sang alkalde nga nagahulat man sila sang bulig nga igatan-ay sang gobyerno probinsyal sa ila apektado nga manugpanginhas.
Nahibaluan nga kalabanan nga pangabuhianan sa ila banwa amu ang pagpangisda uon pagpanginhas.
