ROXAS CITY – Napasakaan na sang kaso nga paglapas sa Presidential Decree 1602 ukon Anti-Illegal Gambling law ang 45 anyos nga lalaki nga nadakpan bangud sa pagpataya sang iligal nga STL, sa Barangay San Esteban, banwa sang Pilar.
Matandaan nga ginkilala ang nadakpan kay Eddie Verona Garray, nga residente sang Brgy. Sta. Fe, sa nasambit nga banwa.
Sa interview sang Bombo Radyo kay PMaj. Alfred De Leon, hepe sang Pilar MPS, ginsiling sini nga pinaagi sa inquest proceeding natigayon nga mapasaka ang kaso batuk kay Garray.
Nahibaluan nga nagpakuno-kuno pa ang nasambit nga persona nga koridor ini sang lehitimo nga STL operator sa Capiz, apang sa pagtsekyar sang mga kapulisan sa listahan nagikan sa 888 Good Fortune Gaming Ventures, wala ang pangalan ni Garray sa mga ligal nga nagapataya.
Nakuha sa posesyon ni Garray ang isa ka portable printer, 4 ka stabs sang cotejo, isa ka pink ballpen, 1 ka sling bag kag P9,806 nga kuwarta sa nagkalain-lain nga denominasyon.
Nagapabilin ini sa Pilar MPS para sa nagakaigo nga disposisyon.
