TAPAZ, CAPIZ – Tuman ang kalipay sang manunudlo gikan sa banwa sang Tapaz, Capiz sa iya nabaton nga kadungganan sa 2025 Gawad Lingkod Bayani.
Sa interview sang Bombo Radyo kay Mrs. Jocelyn G. Garbosa, Master Teacher 1 kag Teacher in Charge sang Roxas Farm School sa Tapaz, Capiz, iya ginpahayag nga lakip ini sa ginpasidunggan sang Gawad Dangal ng Bayan nga ginhiwat sa Malacañang.
Ang nasambit nga pasidungog ang ginahatag sa mga indibidwal nga may daku nga kontribusyon sa pag-improve sang mga estudyante, maayo nga patakaran kag pamalakad sa mga kaupod nga manunudlo kag sa eskwelahan.
Suno kay Garbosa, ang Roxas Farm School ang nag-umpisa sang 2011 bilang isa ka extension sang Candelaria National High School apang sang tuig 2021, opisyal na ini nga nag-separate kag nangin isa ka farm school.
Pahayag pa niya, wala na ini nagalaum nga makuha pa ang amo nga pagpasidungog apang sa hugot nga pagsalig , nahatagan ini sang tsansa nga mangin isa ka awardee.
Nagpasalig man ang natungdan nga magapadayon ang iya tampad nga pagserbisyo kag pagpalangga sa iya mga estudyante nga propesyon.
INTERVIEWED BY: BOMBO ROADNIE DABAN DALANON
