Patay ang isa ka estudyante kag teacher sini samtang anom ang pilason, matapos magpaulan sang bala ang 15-anyos nga babaye nga suspek sa isa ka private Christian school sa estado sang Wisconsin, United States (US) kahapon nga adlaw, Disyembre 17, 2024.
Suno sa mga otoridad nahibaluan nila nga estudyante man sa amu nga buluthuan ang suspek kag nag-attend pa ini sa klase antes ginhimo ang mass shooting nga sang ulihi nasapwan man ini nga wala na sang kabuhi sa ginluntaran sang insidente.
Nagapati naman ang mga pulisya nga gintiro sang suspek ang iya kaugalingon apang para makasiguro magapaidalom ang suspek sa autopsy agud mahibaluan ang cause of death sini.
Apisar wala pa natumod sang mga polisya ang motibo sang suspek padayon naman nila nga ginaimbistigaran ang pamilya sang suspek kun paano ini nakakuha sang pusil nga amu ang gintunaan sang kamatayon sang duha la persona kag ginkapilas sang anom ka estudyante.
Gin-report pa sang pulisya nga duha ka estudyante ang nag-agom sang kritikal nga sitwasyon kag apat ka iban pa ang padayon nga ginabulong sa ospital.
Nagpaguwa naman sang mensahe si US President Joe Biden nahanungod sa natabo nga pagpangluthang nga suno sa iya makahalanugsbo kag wala sang kaluoy ang naghimo sang nasambit nga krimen.
Sa kaso sang gun violence sa US, na-record sang news organization nga EducationWeek ang 38 nga kaso sang school shootings sa tuig 2024 kun sa diin 69 na ang na-report nga napilasan kag masobra 16 na ang napatay.
