ROXAS CITY – Daku nga pagpanghangkat sa mga manunudlo, estudyante kag ginikanan ang bag-o lamang nga pagbukas sang klase subong nga S. Y 2020-2021 kadungan sang ginapangatubang nga pandemya sa Pilipinas.
Sa interview sang Bombo Radyo kay Shayne Esquillo, Grade 9 adviser sa Milibili National High School nga nagaapelar gid ini sa mga ginikanan nga bantayan ang ila mga kabataan sa pagtuon sa tagsa nila ka mga puloy-an.
Ginpahayag sini nga kun mahimo ipasabat gid sa ila ang mga pamangkutanon nga nasaad sa ila modules kag indi ini pagsabtan agud mahanas man ang ila mga kabataan.
Dugang pa sini nga apisar mabudlay subong ang sitwasyon kag indi face to face ang klase kinahanglan nga tutukan kag magtuon sa gihapon sang ensakto ang mga estudyante.
Sa pahayag naman sang isa ka ginikanan nga si Maricel Octovio nga nabudlayan ini sa bag-o nga sistema sang Department of Education apang wala ini sang mahimo bangud luyag sa gihapon sini nga makaeskwela ang iya mga kabataan.
Ginpahayag ni Octovio nga mabudlay ini para sa kasubong niya nga ginikanan bangud indi man lang isa ang iya ginapaeskwela kundi lima.
Mahibaluan nga nagabusong pa ini kag may yara sang gamay nga bata apang wala siya sang mahimo bangud siya sa gihapon ang nagakuha sang modules sa eskwelahan agud nga may yara lamang sang tun-an ang iya mga kabataan.
