ROXAS CITY – Personal nga nagpabalhag sa Roxas City Component Police Station ang isa ka manunudlo sa isa ka buluthuan sa Pueblo De Panay, Barangay Lawaan, Roxas City, matapos nga ginaalegar nascam sang ila ginpatahian sang gown kag barong kahapon Hunyo 7, 2023 takna ala 1:30 sang hapon sa Barangay Lawaan, Roxas City.
Sa impormasyon nga nakuha sang Bombo Radyo sa Roxas City Component Police Sation nga suno sa biktima nga indi na paghingadlan 39-anyos kag residente sang Homesite, barangay Lawaan, Roxas City, nga sadtong Mayo 16, 2023 takna alas 10:00 sang aga nakit-an sini niya pinaagi sa facebook post sang ACE Garcia facebook page nga nagapanahi ini kag nagaparenta sang mga gowns kag barongs.
Mahibaluan nga sa nasambit nga tion nagapangita sila sang mga kaupod sini nga mga manunudlo sang ila suksukon nga mga barong kag gown.
Bangud sini, nakipagtransaksyon sila sa suspetsado nga ginkilala kay Ismael Garcia Bajada yara sa intsakto nga pang-edaron kag residente sang Barangay Mongpong, Roxas City.
Suno sa manunudlo nangin maayo man ang ila transaksyon tubtob nga ginkuha na sini ang ila mga sukat kag personal pa nga nagpadulong sa ila buluthuan agud kuhaan sang sukat ang 9 pa niya nga mga kaupod nga manunudlo kag nagpangayo sang 50% nga down payment, apang matapos nga makuha ini kag makaligad ang duha ka semana wala na nagpabatyag si Bajada.
Ginpahayag man sang nagpabalhag nga madamo na sang mga alibis si Bajada kag tubtob nga indi na nila ini makontak.
Nataban ni Bajada ang P5,500 nga downpayment sang mga manunudlo kag tubtob subong wala na sila sang impormasyon nga nakuha angut sa nasambit nga suspetsadto.
Sa karun, luyag lamang sang mga manunudlo nga mabalik ang ila nga kwarta.
