MAMBUSAO, CAPIZ – Wala sang nagakaigo nga papeles ang ginaalegar manunudlo nga nagpa-amot sa mga estudyante para sa aktibidad sang Drum and Lyre Corps sa David Moises High School sa Barangay Balit, Mambusao, Capiz.
Aminado ang manunudlo nga si Catherine Mae Pacardo ang supervisor sang DRUM AND LYRE CORPS sang nasambit nga buluthuan nga nagpa-amot ini sang P950 sa mga estudyante para sa patigayunon nga aktibidad nga ginapasakupan sang nasambit nga buluthuan.
Mahibaluan nga nagpatawag sang sinapol si Pacardo sa mga estudyante kag ginikanan para ipaathag nga may yara sang balayaran para sa trainer nga nagatudlo sa mga estudyante kag mga kagamitan kaangay sang drum and lyre nga ginapaarkilahan sa mga estudyante.
Apang wala ini nagalaom nga madamo sang indi pabor sa nasambit nga balayaran.
Ginpahayag sini nga masami man sila nagapa-amot kun may mga aktibidad nga ginapatigayon sa ila buluthuan.
Samtang, sa pagpangusisa sang hubon sang Bombo Radyo Roxas sa nasambit nga manunudlo, wala ini sang may ginpakita nga dokumento ukon nagakaigo nga papeles nga may yara sang kasugtanan nga nagpasugot ang mga ginikanan nga may yara sang balayaran ang ila mga kabataan.
