Patay ang isa ka manunudlo matapos ginluthang sang wala pa makilala nga suspek sa Sitio Burwang, Barangay Linambasan, Jamindan, Capiz.
Ang biktima amo si alyas Jo-Ann, 44 anyos, residente sang nasambit nga lugar kag isa ka manunudlo.
Sa interview sang Bombo Radyo Roxas kay PCapt. Jaypee Silvestre, Hepe sang Jamindan Municipal Police Station, iya ginpahayag nga samtang nagapungko ang biktima kaupod ang iya mga abyan sa garahe, hinali na lang ini nga ginpalapitan sang isa ka lalaki nga naka-bonnet kag ginluthang gamit ang armas nga 9mm.
Suno kay Silvestre, wala man sang record ang kapulisan nga may yara sang pamahog nga nabaton ang manunudlo.
Pahayag niya, ang biktima gid ang target sang suspek bangud siya lang ang ginluthang apisar may mga upod ini sang natabo ang krimen.
Na-recover sang kapulisan ang anum ka mga fired cartridge kag isa ka deformed slug.
Sa subong, may yara na sang anggulo kag tawo nga ginasundan ang kapulisan sa likod sang natabo nga krimen apang indi pa ini masapubliko.
Nagapangabay ang Jamindan PNP sa testigo sang kooperasyon agud mahatagan sang hustisya ang kamatayon sang manunudlo.
Interviewed by Bombo Sunnie Mae Constantino Batencila | via Bombohanay sa Udto
