ROXAS CITY – Dalayawon ang proyekto sang isa ka manunudlo sa Capiz nga nagapanghatag sang mga learning modules sa mga kabataan sa karon nga panahon sang pandemiya bangud sa coronavirus disease (COVID-19).
Sa interview sang Bombo Radyo kay Jerick Brillo sang Mayor Ramon A. Benjamin Sr. Nat’l High School, ginpahayag sini nga ang nasambit nga proyekto ang naba-se sa Barangay Dacuton, Dumarao nga gintawag nga ‘Project Duag’ kun sa diin ginahatagan sang modules kag school supplies ang mga kabataan sa amo nga banwa.
Nahibaluan nga naglab-ot na sa halos 180 ka mga estudyante ang nahatagan sang bulig kag pito ka mga eskwelahan naman ang nahatagan sang donasyon.
Nagapanghatag man ini sang alcohol, spray bottles kag mga face masks.
May yara man ini sang digital contest kun sa diin mahimo nga magpakigbahin ang mga kabataan.
Nagalibot man ini sa mga kabalayan agud mag-refill sang libre sang mga empty alcohol bottles.
Natalana naman nga i-lunsiyar ang Pag-Amlig Version 2.0 kun sa diin target nga mangin benepisyaryo ang tatlo ka mga age groups nga mga bata, teenagers kag adults.
Pagatinguhaan man sini nga mapalab-ot ang bulig sa Aeta community sa nasambit nga banwa.
