Gintawag ni Rodante Marcoleta nga “marites” ukon nagahatag sang indi beripikado nga impormasyon si Frederick Vida, may kaangtanan sa gin-report nga pag-aresto sa anay kongresista kag pugante nga si Zaldy Co sa Czech Republic.
Suno kay Marcoleta, may hinala siya nga si Vida ang naghatag sang indi pa kumpirmado nga impormasyon kay Ferdinand Marcos Jr. nga nadakpan si Co sa nasambit nga pungsod. Bangud sini, ginpahayag nga naghinyo ang secretary sa Presidente nga magkadto personal sa Czech Republic agud makumpirmar ang sitwasyon.
Ginkuwestiyon man sang senador ang pagkadto sang mga opisyal sang Department of Justice sa amu nga pungsod.
Suno sa iya, kun matuod nga naaresto si Co sa iban nga pungsod, dapat nagagana gilayon ang “consular notification process” kun sa diin ginapahibalo ang embahada parte sa pagkilala sang nadakpan, rason sang pagdetain, kag iban pa nga detalye.
Dugang pa ni Marcoleta, mahimo man makuha ang amu nga impormasyon halin sa Czech Embassy sa Pilipinas, rason nga nagapamangkot siya kun ngaa kinahanglan pa magkadto sa amu nga lugar ang mga opisyal gamit ang pondo sang gobyerno.
Samtang, ginpahayag man sini nga kun may opisyal gid nga impormasyon angut sa gin-alegar nga pag-aresto, dapat ini ipagwa sa publiko agud malikawan ang pagduda.
Sa subong, wala pa sang opisyal nga kumpirmasyon halin sa mga awtoridad sang Czech Republic angut sa ginreport nga pagdetain kay Co.
