Ginakabig nga posible mangin mga lider sang Senate Blue Ribbon Committee sanday Rodante Marcoleta kag Pia Cayetano suno kay Alan Peter Cayetano.
Siling ni Cayetano, ang komite indi lang magatutok sa alegasyon sang iregularidad sa mga flood control projects kundi pati man sa insidente sang pagpangluthang sa Senado kag sa ginapahayag nga papel sang National Bureau of Investigation ukon NBI sa nasambit nga hitabo.
Dugang pa niya, wala pa sang pinal nga desisyon kon sin-o gid ang mangin chairperson sang komite bangud nagkasugtan ang bag-o nga majority bloc nga wala sang senador nga automatic nga makapili ukon makapangayo sang komite nga iya gusto pangunahan.
Ginpahayag man ni Cayetano nga daku ang pressure nga iya naagom sa nagligad nga mga semana bilang Senate President, apang napabilin niya ang suporta sang kadam-an sa Senado. May mga nagakatabo man kuno nga tikang agud mabag-o ang balanse sang pwersa sa Senado bangud sang naglain-lain nga isyu pulitikal kag mga reshuffle sa komite.
