Ginaduso sang administrasyon ni President Ferdinand Marcos Jr., ang P7.2-trillion nga national budget para sa 2027, katumbas sang 21.7% sang gross domestic product (GDP) sang pungsod.
Mas mataas ini sang 6% ukon P407 billion kon ipaanggid sa P6.793-trillion nga budget para sa 2026, suno sa National Budget Memorandum (NBM) No.158 nga ginpagwa sang Department of Budget and Management (DBM).
Suno kay DBM Acting Secretary Kim Robert de Leon, ang ginaduso nga budget ang magatutok sa mga programa nga makatuga sang dugang nga oportunidad para sa mga Pilipino kag makapabaskog sang stability kag seguridad sang pungsod.
Ginhatagan man niya sang importansya nga hatagan sang prayoridad ang mga proyekto sa imprastraktura, lakip ang mga hilikuton antes sang konstruksyon, counterpart funding para sa mga proyekto nga ginabuligan sang mga dumuluong, kag pundo nga kinahanglanon agud mapadasig ang pagtapos sang mga flagship projects sang gobyerno.
