ROXAS CITY – May ginahimo na nga tikang ang Barangay Council sang Mongpong, sini nga syudad, agud madakpan si Mark Cortado Uy, ang ginatudlo suspek sa duha ka insidente sang pagpanghold-up sa Arnaldo Blvd., Brgy. Baybay kag ang pagmotornap sa Brgy. Mongpong.
Sa interview sang Bombo Radyo kay Punong Barangay Ricky Donato, ginpahayag sini nga may ginadihon na sila nga tikang agud matumod ang ginahamtangan sang nagpalagyo nga si Uy, apang indi pa ini mapalayag sa kahanginan.
Makabig man suno diri nga high level ang pagiging makawat sang suspek bangud sa iya estilo.
Ini bangud ang tag-iya sang motor nga ginkawat ni Uy, ang bata sang isa ka retirado nga pulis, kag sa sulod pa sang ugsaran ginkuha ang motor.
Matandaan nga duha pa lamang ka semana nga pangayaw sa ila barangay ang suspek, matapos nga nagsapol ini sa iya half-brother nga si Wennie Cortado, nga amu ang residente sang Brgy. Mongpong.
Natigayon nga makilala si Uy nga amu ang holdaper matapos nag-alalangut ang pila ka mga ebidensiya nga natigayon makumpirmar pinaagi sa kooperasyon sang nasambit nga utod sa luwas ni Uy.
Sa karon, padayon nga ginalalip sang otoridad ang nasambit nga suspek.
Ginapaandaman man ang mga pumuluyo nga magpakig-angut sa ila barangay sa posible lokasyon sang suspek.
