ROXAS CITY – Handa makipagkooperar ang market administrator sang Teodoro Arcenas Trade Center (TATC) para sa hugot nga implementasyon sa pagsuksok sang face mask sa pampubliko nga lugar.
Ini ang ginpahayag ni Mrs. Heloise Mendoza, Market Administrator sang TATC sang mainterview sang Bombo Radyo.
Suno diri, dati pa nga may yara sang ordinansa nga ginapatuman natuhoy sa pagsuksok sang facemask apang aminado ini nga nagluga na ang pag-implementar sang layi bangud sa pagnubo sang kaso sang COVID-19.
May yara man sang nagasita sa guwa kag sulod sang merkado apang ginabantayan man sila sang pumuluyo nga magtalikod kag kakason ang facemask.
Samtang ginahulat na lang ni Mendoza, ang ipaguwa nga ordinansa ukon executive order sang gobyerno para sa nagakaigo nga aksyon nga kinahanglanon.
Pabor man ini nga striktohon ang pag-implementar sang health protocols agud makalikaw sa pag-angkon sang makalalaton nga balatian kag liwat nga magtaas ang kaso sang COVID-19.
