ROXAS CITY – Wala pa sang instruksyon nga nabaton gikan sa alkalde sang syudad ang market administrator sang Teodoro Arcenas Trade Center angut sa pagbalik sang market day tagsa ka Domingo nga adlaw.
Apang suno kay Mrs. Heloise Mendoza kun siya ang pamangkuton, indi ini pabor nga ibalik sa karon nga panahon ang market day bangud mabudlay nga ma-maintain ang social distancing labi na nga may pila sa gihapon ka mga indibidwal nga salawayon kag nagalapas sa pagsulundan.
Ginpahayag pa sang administrador mahimo lamang nga mabalik ang market day kun masiguro nga zero na sa COVID-19 ang syudad sang Roxas kag probinsiya sang Capiz.
Ginkumpirma man sang opisyal nga nag-strategized sila sang pila ka mga pagsulundan agud makontrol ang pagsulod sang mga bumalakal kag mapatuman ang social distancing.
Otomatiko man nga ginapakita sang mga market goers ang ila quarantine pass kun magsulod na sila sa merkado, paggamit sang face mask, pag-obserbar sang social distancing kag pag-agi sa sanitent nga makit-an antes magsulod sa merkado ang isa ka bumalakal.
Nagpangabay man si Mendoza sa mga senior citizen kag menor de edad nga indi magpadulong sa TATC bangud yara sila sa vulnerable sector nga makabig high risk.
Samtang aminado man ang opisyal nga may yara sa gihapon nga mga salawayon nga indibidwal nga nagalapas sa pagsulundan, kasubong sa indi pagsuksok sang face mask, wala pag-obserbar sang social distancing kag pagpanigarilyo sa pampubliko nga lugar.
Nagpangabay man ini sa publiko kun luyag mabalik ang market day, dapat magkooperar ang tanan
